தமிழ் பார்வை யின் அர்த்தம்

பார்வை

பெயர்ச்சொல்

  • 1

    பார்க்கும் செயல்; பார்த்தல்.

    ‘அவளுடைய பார்வை தன் மீது பட்டதை உணர்ந்தான்’
    ‘சிறுவனின் சோகம் கலந்த பார்வை மனத்தைத் துன்புறுத்தியது’

  • 2

    பார்க்கும் திறன்.

    ‘வயதானால் பார்வை குறைந்துவிடுகிறது’
    ‘ஒரு விபத்தினால் அவரது பார்வை பறிபோயிற்று’

  • 3

    (தலைவர்கள், நடிகர்கள், மதத் தலைவர்கள் போன்றோர் இறந்தால் அவர்கள் உடலுக்கு) பொது இடத்தில் மக்கள் வந்து அஞ்சலி செலுத்துதல்.

    ‘தலைவரின் பூதவுடல் பொதுமக்களின் பார்வைக்காக மண்டபத்தின் நடுவில் வைக்கப்பட்டிருந்தது’

  • 4

    (விற்பனைக்காக அல்லாமல்) காட்சிக்காக மட்டும் என்ற ஏற்பாடு.

    ‘ரவிவர்மா வரைந்த படங்கள் பொதுமக்களின் பார்வைக்காக நான்கு நாட்கள் வைக்கப்படும்’

  • 5

    தோற்றம்/எடுப்பான தோற்றம்.

    ‘வெற்றிலைக் கொடியும் மிளகுக் கொடியும் பார்வைக்கு ஒன்று போலவே இருக்கும்’
    ‘வீடு பார்வையாக இருக்கிறது’

  • 6

    மேற்பார்வை; கவனம்.

    ‘பிரதமருக்கான மதிய உணவு எனது நேரடிப் பார்வையில் தயாரிக்கப்பட்டது’
    ‘மேலதிகாரியின் பார்வைக்குக் கோப்பு அனுப்பப்பட்டிருக்கிறது’

  • 7

    (ஒரு விஷயத்தை) அணுகும் முறை; கண்ணோட்டம்.

    ‘இந்தப் பிரச்சினையில் உனது பார்வை சரி இல்லை’
    ‘இந்த நூலைப் பொறுத்தவரை உங்கள் பார்வை வித்தியாசமாகத்தான் இருக்கிறது’