தமிழ் -ஆக யின் அர்த்தம்

-ஆக

இடைச்சொல்

  • 1

    ஒரு பெயர்ச்சொல்லை வினையடை ஆக்கும் இடைச்சொல்.

    ‘குழந்தை அழகாகச் சிரிக்கிறது’
    ‘வேகமாக வா’

  • 2

    ஒரு தொடரை வினையடை ஆக்கப் பயன்படும் இடைச்சொல்.

    ‘மகன் வெளிநாடு செல்வதாகக் கனவு கண்டார்’
    ‘அவர் எனக்குப் பணம் தருவதாகச் சொன்னார்’

  • 3

    ஒரு வாக்கியத்தில் எழுவாயின் தன்மை, நிலைமை போன்றவற்றைக் குறிக்கும் சொல்லை உருவாக்கப் பயன்படும் இடைச்சொல்.

    ‘அவன் சிறந்த வீரனாக விளங்குகிறான்’

  • 4

    ‘போல்’ என்ற ஒப்புமைப் பொருளில் பயன்படுத்தும் இடைச்சொல்.

    ‘இட்லி கல்லாக இருக்கிறது’
    ‘கவலைகள் இல்லாமல் மனம் பஞ்சாக இருந்தது’
    ‘அவன் புலியாகப் பாய்ந்தான்’
    ‘என்னை நிழலாகத் தொடர்ந்தாள்’

  • 5

    நான்காம் வேற்றுமை உருபுடன் இணைந்து ‘பொருட்டு’, ‘காரணமாக’ என்ற பொருளைத் தரும் இடைச்சொல்.

    ‘உனக்காக இந்த உதவியைச் செய்கிறேன்’
    ‘அவன் செய்த சிறு தவறுக்காக இவ்வளவு பெரிய தண்டனையா?’

  • 6

    பிறரின் தூண்டுதல் இல்லாமல் கர்த்தாவே தன்னிச்சையாகச் செயல்படுவது என்ற பொருளைத் தரப் பயன்படுத்தும் இடைச்சொல்.

    ‘நான் கேட்கவில்லை, அவராகக் கொடுத்தார்’
    ‘தானியங்கி இயந்திரம் என்பதால் அது தானாகவே நின்றுவிடும்’

  • 7

    ஒரு செயல் தொடர்ந்தும் மிகுதியாகவும் நிகழ்கிறது என்ற பொருளைக் காட்டும் இடைச்சொல்.

    ‘அவள் சேலைசேலையாகப் புரட்டிப் பார்த்தாள்’
    ‘அவருக்குக் கோபம்கோபமாக வந்தது’
    ‘சரியான முகவரி தெரியாமல் தெருவில் வீடுவீடாக ஏறி இறங்கினான்’

  • 8

    வாழ்த்து, வசை முதலியவற்றைத் தெரிவிக்கப் பயன்படுத்தும் இடைச்சொல்.

    ‘பரமண்டலத்திலுள்ள எங்கள் பிதாவே, உம்முடைய நாமம் ஜெபிக்கப்படுவதாக, உம்முடைய ராஜ்ஜியம் வருவதாக!’
    ‘‘நீ புழுவாய்ப் பிறப்பாயாக!’ என்று சபித்தார்’